中環出更：鄉郊踩單車劉國勳自爆畀狗追
單車係居住喺新界鄉村必備嘅交通工具，加上秋天都係適合踩單車嘅季節，新界鄉議局尋日就聯同一間共享單車公司喺上水舉辦新界單車遊，鄉議局主席劉業強同離島區議員鄧家彪（Bill）都有落場踩單車支持，今日冇份踩單車，但幫手發號施令嘅劉國勳就大爆自己以往喺鄉郊踩單車，試過被狗追！
劉國勳話以前喺鄉郊地區踩單車，試過喺後面聽到狗吠聲，發現被狗追，至於嗰隻狗係乜嘢品種，佢就唔清楚嘞，淨係知道要踩快啲，盡快逃離現場。佢話其實啲狗都係有村民養嘅，只要離開咗佢哋嘅地盤，啲狗就唔再追上嚟o架啦，所以都係有驚無險。講起共享單車問題多多，佢就覺得政府都有責任，投資推廣署引入共享單車後，其他政府部門都應該幫手諗吓點樣解決泊位等問題。
劉業強自備單車落村
劉業強尋日就有份踩單車支持，身兼行政會議成員同立法會議員嘅佢出席呢個活動亦相當識得避嫌，自備單車現身，喺呢個有單車提供嘅活動中，可算係少數分子。佢話自己都幾年冇踩單車，今日既然一場嚟到上水，仲順便落村視察吓添，又笑指自己架車都有啲生銹，不過現場嘅單車又係單速度，上斜會辛苦啲，所以都係自備單車好啲，覺得香港嘅共享單車應該提升質素。
阿Bill喺活動中就使用共享單車，佢話冇乜尷尬，自己並非反對共享單車，只係要求政府執法同共享單車公司要守法，例如該公司應租私人地方做倉，亦可以考慮以定位系統搵出冇遵守規定嘅使用者。佢話今次踩到去羅湖，大約踩咗八公里，沿途景色優美，未來最好有啲綠色旅遊嘅路線，踩到去沙頭角喎。
卓妮