政情：劉燊濤遊南韓 掃面膜有篋送
好多人去南韓旅行都會買到停唔到手，尤其係護膚品相當便宜，不過，男人都狂買面膜就少見啲，香港工業總會青年委員會名譽會長劉燊濤（Gary）被太太大爆佢喺南韓旅行嘅時候，買面膜買到對方送咗個篋畀佢，聽落都相當貪靚。
Gary話去到南韓旅行真係忍唔住不停買，唔買好似冇去咁，依家屋企真係有好多面膜，自己晚晚都會敷，橫掂都係坐喺度睇電視，咁咪敷吓囉！劉太就話Gary敷得勤力過自己，自己都係三日先敷一次，而Gary買咗咁多面膜，自己都幫手用咁啲。
劉太又講起依家會日日同囝囝一齊飲湯，最近仲開始蒸洋葱水畀囝囝飲，好處多多，可以殺菌、防感冒同止咳，最底先有洋葱味，飲落係好甜添，囝囝話係蘋果汁喎。