政情：陳張樂怡接棒 為旅議會「脫監」做準備
旅遊業議會總幹事董耀中（阿Joe）將於下月退休，由副總幹事陳張樂怡（Alice）接棒。對於政府正籌組旅監局，Alice就話現時工作量不減反增，既要應付現有嘅監管工作，亦要為日後議會「脫監」後做準備，推出更多協助業界嘅措施爭取會員留低。
其實Alice係旅議會嘅老臣子，喺議會工作咗廿四年。佢話自己並非旅遊業界出身，最初入議會以為係做一般行政工作，加入後先發現旅遊業有好多問題要處理，工作量繁多，但可以推出改善措施完善業界嘅營運環境，覺得好有意義。
要時間適應傳媒查詢
Alice過去一直拍住阿Joe出席議會大大小小的會議，所以非常熟悉議會嘅工作，接手應無難度，不過，對於傳媒「午夜凶鈴」嘅查詢，睇嚟要畀啲時間適應喇！
至於阿Joe，名義上十二月廿四日正式退休，但十二月十四日已開始休假。唔講唔知，原來佢加入議會前曾喺日航同大韓航空工作，一生與旅遊業結下不解緣。