政情：蔡冠深遊緬甸一腳泥 太太唔嫌臭
一帶一路國家嘅文化同香港都有好大分別，去到當地旅遊同投資都要適應一下，原來中華總商會會長蔡冠深帶團去緬甸嘅時候，試過成腳都係泥咁去廁所，相當污糟，都需要經過啲心理關口o架！
以身作則 尊重當地文化
蔡冠深話緬甸係佛教國家，去寺廟等地方需要除鞋先可以入去，自己就試過落大雨踩到啲田，搞到成腳都係泥，但都要除鞋先可以入寺廟；仲有次要除鞋去廁所，成腳泥，廁所又係濕嘅，由於當日係佢帶團，所以都要以身作則，做個榜樣畀團友。佢又話即使當日抹完腳之後，對腳都仲係黑色嘅，就咁着番鞋同襪，返到酒店，太太都冇話嫌佢隻腳污糟，但佢自己都好醒水，快啲去洗腳。
蔡冠深覺得本港喺一帶一路方面，例如呢啲風俗文化，仲未做好民心相通，所以下月初喺遮打花園，會搞「一帶一路繽fun遊」，希望市民了解多啲當地風俗喎。