政情：何俊賢教開榴槤笑黨友唔專業

沙田區議員黃冰芬（Iris）尋日喺辦事處外上演開榴槤，仲拍片上網同朋友分享，連佢嘅黨友、立法會漁農界議員何俊賢（高佬賢）都有注意。高佬賢更隨即專家上身，隔空傳授開榴槤技巧添！高佬賢留言教路，指要為榴槤開個口，之後再左右撐開就得，唔使繼續切咁話。而佢講起條片時，仲形容Iris似切蛋糕添！

高佬賢其後就話見到條片令佢諗起舊事，因為年幼時經常去婆婆居住嘅新發邨，當時邨內有一間生果舖成日教佢點樣揀生果，所以咪略懂一二囉。佢仲話以前婆婆特別鍾意食楊桃所以有專登去學，但依家就淨係記得點揀西瓜同榴槤喇。

至於Iris就大讚貓山王榴槤好食，但當時嘅榴槤味傳到好遠，所以十五分鐘後就急急清理現場，費時畀人投訴。不過，佢就話開榴槤期間都有市民經過，仲形容陣榴槤味似隔夜餸渣添！