政情：廠商會改選突變徐炳光棄選會長

徐炳光喺聲明中稱唔會參與會長競選，同時亦將退出會董選舉。佢話今次選舉由開始至今，發展令佢始料未及，佢亦從未諗過會有機會經歷咁戲劇化嘅過程，包括「有追名逐利的背叛、有光天化日的謊言、有惡語相向的攻擊」等等，希望自己嘅退出可以「為會董會爭取更大的空間」，同時亦唔想睇到老友為咗支持佢而繼續承受壓力、左右為難。

料按慣例 任名譽會長

廠商會近半年來選戰白熱化，亂象百出，確實好似睇戲咁激。由最初兩陣營互鬥拉攏新會員入會，導致新會員暴增千幾人，到兩陣營互射冷箭、涉嫌冒名收票，仲因而報警，甚至鬧上法庭添！上月底第一輪新會董選舉揭盅，兩邊陣營各提出廿六人名單，結果由吳宏斌陣營獲得全勝。有人猜測，可能因為咁，徐炳光覺得對落敗嘅廿六名會董唔好意思，所以希望自己退出，可以換來一場真正選賢與能嘅選舉，令佢陣營中有才能嘅人亦可以喺下一輪會董選舉中當選。

徐炳光接受查詢時證實唔參選會長嘅決定，因為選戰令廠商會內部嚴重撕裂，希望佢嘅決定可以為廠商會帶來大團結。佢話加入廠商會至今已十五年，今次佢全身而退，意味着將按慣例升任廠商會名譽會長，但佢亦話日後仲有好多平台可以服務社會，包括現時仲係廠商會蔡章閣中學校董、孔聖堂中學校監等，將來佢會繼續支持廠商會，有乜嘢事亦會繼續效勞。

歷史重演 與三年前相似

而吳宏斌接受查詢時就話暫唔回應今次事件。因為按照選舉程序，今個月廿八日先至選舉產生一百一十名會董，具備會董資格先可以喺本月三十日報名參選會長，現時佢都未報名參選，故此回應屬言之過早。

雖然今次事態發展好突然，但情景又似曾相識。事關三年前廠商會改選，當時角逐會長之位嘅時任副會長李秀恒同顏吳餘英對壘，選情居下風嘅顏吳餘英臨尾宣布棄選，由時任副會長陳淑玲頂上，結果最終由李秀恒成功勝出。唔知今次會唔會臨尾又殺出第三者呢？