中環出更：百厭星鄺俊宇 玩鞦韆跌鑊甘
講起遊樂場嘅回憶，少不免會諗起喺夏天熱到辣親皮膚嘅鐵滑梯、可以有幾層樓咁高嘅搖搖板、仲有唔同款式嘅鞦韆等等，早排立法會議員鄺俊宇曾經要求政府喺新建遊樂場上加鞦韆，後來仲自爆自己好鐘意鞦韆同攀爬繩網添！佢仲透露曾經玩鞦韆整親，搞到心口落地周身痛添！
細個貪玩 跌過先識驚
鄺俊宇話以前仲係細路仔時百厭貪玩，玩親滑板型鞦韆，總會唔係正正常常咁坐低玩，而係企起身咁玩。佢憶述，事發嗰陣大約係讀緊小學一、二年級，而當時就正正係企起身玩，一個唔覺意鬆開手就成個人跌落地，仲要心口落地添！佢仲話跌完落地嗰刻仲唔覺痛，識得起番身，但係隔咗幾分鐘啲痛楚就開始嚟料，搞到要攤喺地下。
心口落地，可大可小喎，但鄺俊宇話屋企人完全唔知情，事關佢返屋企時唔敢同屋企人講，所以忍住痛咁返屋企。好彩佢都見過鬼怕黑，之後玩鞦韆都唔敢再企起身，乖乖地坐低玩喇！佢仲話以前啲遊樂設施刺激好多，仲認為小朋友唔跌過唔識驚，認為政府可以改善吓啲遊樂設施，一來可以等大家回味吓，二來增加刺激性，等小朋友喺享受玩樂時都會學吓保護自己。
卓妮