中環出更：曾行乞偷渡胡楚南談創業秘辛

胡楚南夫婦（左二及三）設宴慶祝創業五十年，高叔平夫婦（左一及右一）開心到賀。（余素月攝）

胡楚南笑言最大嘅興趣係攝影同舞蹈，形容自己可能係睇得最多舞蹈嘅門外漢。廿年前，佢以香港舞蹈總會會長身份同二仔胡智聰到內地訪問時，遇上喺北京舞蹈學院學習嘅二新抱王凱曼（Carmen），唔止促成咗呢段姻緣，後來Carmen仲獲指定為家族珠寶生意接班人添！好多人唔明，有五個仔女嘅胡楚南點解唔畀仔女接班，原來佢曾經同哥哥因意見唔同而拆夥分家，深知「一山不能藏二虎」嘅道理，所以唔畀仔女返公司幫手，呢段傳承秘辛都幾有趣。

楊靜搞珠寶睇好寵物市場

當晚好多政界同珠寶業界人士到賀，受到老爺睇高一線嘅Carmen忙到滿場飛。香港珠寶製造廠商會中國內地事務小組成員朱容基同太太楊靜（Sally）、做鐘錶生意嘅上海總會副理事長高叔平夫婦都有到場。講起生意經，高叔平笑笑口話鐘錶零售市道已明顯復甦，事關有做旅行團生意嘅店面，最差時一間舖一日少過十架旅遊巴士造訪，依家就超過一百架，強勁反彈達十倍，但遊客嘅消費能力就差啲，得番以前嘅一半，但係有得忙就開心喇！ 做鑽石首飾批發嘅Sally就忙於籌備自家珠寶品牌，今次係佢第一次做品牌，仲決定行另類路線，包括幫寵物主人度身訂造家中飾物。佢笑言因為好鍾意狗仔，自言係狗奴，所以知道呢個市場一定好受歡迎喇！

朱容基（左）同楊靜（右）忙於籌備自家珠寶品牌。

王凱曼（左）同專程由美國返港嘅姑仔Salina（右）幫手招呼賓客。

卓妮