政情：系統故障 吳永嘉入唔到西九小組
立法會復會已有一個月，議員除咗早前參加各個事務委員會要重新報名，連小組委員會亦需要報名才可以參與其工作，一旦忘記或逾時無報名，事後就要該委員會委員通過才能加入。工業界（第二）議員吳永嘉最近因系統問題，搞咗兩粒鐘都未能報名，未能於截止報名前加入有關監察西九嘅小組委員會。
立法會監察西九文化區計劃推行情況聯合小組委員會於周二（14日）午夜十二時截止報名，吳永嘉去信委員會指，自己於十四日晚上十時登入加入委員會嘅系統，之不過系統「出現故障」，西九小組委員會一欄無加入委員會嘅選項，只有「出席或不出席」下周二（21日）嘅選項，就此佢要於翌日辦公時間致電該小組委員會秘書處了解事件，並且表明加入委員會嘅意願。
陳克勤退出三委員會
另外，再有議員宣布退出委員會，今次係建制派副班長陳克勤，佢以工作繁忙為由，分別退出公務員及資助機構員工、政制及人力事務委員會。