政情：要囝囝獨立 陳智思夫婦冇請家傭
唔少青少年在反叛期經常考起父母，早前喺一個活動上遇到行政會議召集人陳智思，佢就好輕鬆咁話佢十四同十七歲嘅仔完全冇反叛嘅問題。咁乖仔？事關佢哋好唔得閒喎。
陳智思解釋，因為兩個仔要自己做家務、煮飯食，事關由佢哋幾歲大開始，太太就覺得小朋友喺工人姐姐嘅服侍下，好難獨立成長，所以自此屋企就冇請工人。佢仲笑稱最唔適應嘅係佢，仲同太太建議請一個工人姐姐畀佢，結果梗係被否決喇！
講起青少年問題，同場嘅監警會成員劉文文就話自從佢加入監警會之後，第二年就遇到佔領行動，青少年問題變得好敏感、好嚴肅，於是監警會就開始主動到學校同青少年溝通，佢話班學生嘅反應好正面，唔係想像中咁反叛。