政情：抽中30連張紀念鈔 陳振英唔賣留畀子孫
物以罕為貴，乜都可以攞嚟炒，尤其古幣舊鈔票等愈炒愈高。好似中國銀行（香港）早前推出百年華誕紀念鈔，吸引大批市民抽籤認購，本身喺中銀工作嘅立法會金融界議員陳振英亦都有抽埋一份。
中埋單張及三連張
早幾日抽籤結果公布，佢未有收到中籤嘅手機短訊，以為呢個機會唔係佢嘅，又話自己都抽唔中，反映抽籤公平，乘機賣花讚花香喎。點知話口未完，佢就發現自己不但中籤，仲中咗三十連張嘅大獎添！
陳振英尋日自爆有抽紀念鈔，原本佢話雖然收唔到中籤手機短訊感到失望，但對紀念鈔受市民歡迎感開心，又話唔會捱炒價購買，能否入手就隨緣喇！點知喺半小時後，佢就好興奮咁話經上網查詢後，證實自己抽中單張、三連張同三十連張。嘩！簡直係大豐收喇！
雖然十二月先有得領鈔，但坊間早已話三十連張非常有炒賣潛力，不過陳振英就話紀念鈔極具收藏價值，絕對唔會轉售圖利，仲話會將紀念鈔「留畀啲子孫」。啲紀念鈔留得幾十年，炒價就更高喇！陳振英真識計數。