政情：發仔自製地圖 唔驚漏報
香港好多人連搵間屋住都有困難，但有人就因為擁有太多土地而煩惱。眾所周知，已故鄉議局前主席劉皇發（發叔）擁有大量新界土地，早年出任行政會議及立法會等公職時，都話啲土地多到漏報都唔奇，依家到佢個仔劉業強（發仔）接棒，一樣有申報土地嘅煩惱，究竟點樣可以防止漏報利益呢？原來發仔製作咗一個圖表嚟記錄土地資料。
新界人多土地都唔係出奇事，但係做得公職人員，就要做足申報及喺適當時候避席，否則隨時被人質疑有利益衝突，尤其係唔少公職都涉及土地政策，如果冇做好申報，隨時會被質疑係咪想早着先機獲利。當年發叔嘅土地遍布新界各區，佢擔任行會成員後，申報物業及土地數目一度超過七百項，曾經有人追問有關土地位置，但發叔都話講唔清楚。
有一啲鮮為人知嘅事，據說因為發叔太多新界土地，所以要聘請專人駕車去視察，包括檢視土地有冇被人侵佔，以及檢查土地外圍嘅鐵絲圍網有冇損壞等，要視察晒所有土地，就需時足足一個月。土地多，牽涉爭議亦多，發叔都曾經涉嫌漏報買樓利益及「摸貨」圖利，因而掀起政治危機，但事後佢都一一拆解，夠晒滋油淡定。
認有難度 未必知家族成員有咩地
至今同樣持有大量土地嘅發仔劉業強，早前亦成為行會新貴，原來佢喺申報方面都已經要做定準備，似乎係為免再捲入同類爭議。發仔話，開會時只能籠統咁申報有大量土地，佢都會盡量小心啲，但承認有難度，有啲兄弟姊妹持有嘅土地，佢都可能唔知道，仲有「我都唔知老竇有啲咩地」。
發仔又話，現時手上部分土地係爸爸畀佢嘅，以前經爸爸手，爸爸就記得晒，但係佢就未必知，不過佢都做咗個圖表，記錄自己有咩土地o架喇！嘩，啲土地多到有個圖表，真係唔係常人會發生嘅事，所以話呢，香港點會唔夠土地呀？