政情：陳帆「被點名」回應質詢主席叫停
運輸及房屋局局長陳帆尋日長駐立法會，因為議程除咗包括高鐵一地兩檢方案外，佢亦要負責答覆兩條口頭質詢，可謂孭重飛，但勢估唔到連唔係佢負責嘅質詢，都有議員點名要求佢回答，最後要立法會主席叫停。
涉及領展 應由陳肇始作答
運房局涉獵嘅範疇好廣泛，過往都不時有人提出將運輸同房屋事務分拆處理。而喺尋日嘅會議上，六條嘅口頭質詢就分別各有一條涉及運輸同房屋嘅質詢，而另一條由食物及衞生局局長陳肇始負責嘅質詢則涉及領展，就有議員點名要陳帆回答。
議員石禮謙話今時今日市民無法買到日用品，係始於領展不斷出售商舖，質問政府有冇研究領展違反協議，更指有關問題唔係由陳肇始作答，而係由身兼房委會主席、同場嘅陳帆作答。
陳帆就話有睇過同領展嘅合約安排，強調政府可以做嘅都會做喇。而其後又有議員想追問陳帆，但立法會主席梁君彥就話負責回覆嘅官員係陳肇始，而且佢已經作出答覆，答到口水乾嘅陳帆總算可以抖一抖喇！