政情：惜食為基層黃林碧瑢廣尋贊助

近年惜食文化愈嚟愈普遍，唔少有心人加入回收食材做愛心飯盒嘅行列。已成立十幾年嘅膳心連創辦人黃林碧瑢（Vanessa）就話，佢哋專門回收酒店級嘅剩食，然後即日轉贈基層市民，現時已有逾百家餐廳同酒店提供食物畀佢哋，兼且仲有增加嘅趨勢，但佢哋只有七部車，每星期處理運送十二噸食物，若想增加處理量就要添置多兩部車，所以佢最近密密搵贊助，希望得到善心人士支持。