政情：捐復康器材畀仁濟 劉劉寶芝：身受其益
做運動如果一時唔小心用錯力，或者姿勢唔正確造成勞損都幾麻煩。仁濟醫院董事局當年顧問劉劉寶芝一向鍾意打網球，高峰期一個星期會打三次。不過之前就試過整傷腰骨同手，搞到要做物理治療。近日佢就捐咗一百零八萬元，畀仁濟醫院物理治療部添置互動復康器材，佢仲話因為自己都有用物理治療服務，就算捐款其實都係「身受其益」咁話。
打網球曾受傷 要做物理治療
劉劉寶芝同丈夫劉志榮尋日一齊出席仁濟醫院物理治療互動復康器材鳴謝禮，劉劉寶芝話以前一星期打三次網球，後來因為打雙打湊腳難，所以先改為一星期一次。佢話以前試過唔小心整傷，所以要做物理治療，但做物理治療有時都好悶，但有互動復康器材之後，因為器材螢幕可以播放影像，「好似睇卡通片咁」，做物理治療就會變得有趣啲喇。
問到劉志榮有冇陪太太打網球，劉志榮就話以前都有，但近年學騎術，所以就少打咗。咁劉志榮有冇氹太太一齊學騎術呢？佢就話太太見到幾次佢練習時跌咗落嚟，都唔夠膽學喇喎。