中環出更：顏明秀變調酒員介紹手工啤
香港中華廠商聯合會青年委員會早前舉行二十周年酒會，當日青委會搞搞新意思，整咗潮流興嘅手工啤酒，除咗傳統白啤，仲有咖啡同煙肉嘅罕見口味。青委會主席顏明秀（Candy）更以一身調酒員（Bartender）造型，向一眾來賓介紹各款手工啤。
身穿粉紅外套同白色襯衫嘅Candy，以專業調酒員造型迎賓，更幫到場嘅人開啤酒，有姿勢亦有實際。Candy話呢套衫係由媽媽、傑出女工業家顏吳餘英幫佢設計，當晚顏吳餘英亦穿上一件粉紅色外套，一睇就知道係母女裝，兩人合照時，顏吳餘英更為Candy整理上衣，盡顯溫情。
至於點解會特別訂製手工啤，Candy話大牌子嘅酒經常都飲到，所以想搵一啲特別、令人記得嘅味道，而佢發現近年手製啤酒大行其道，所以就訂製咗三款，佢仲特別推薦煙肉口味，貪佢夠獨特，連街外都唔多見。出席活動嘅有唔少愛酒之人，好似香港工業總會青委會主席陳允誠同前主席劉燊濤都話好少飲到煙肉味嘅啤酒，但佢哋就認為煙肉味略嫌不足，笑言如果用煙肉作為下酒菜就一流嘞！
梁峰開發榴槤副產品
另外，經營榴槤生意嘅香港青年聯會成員梁峰透露，隨着國家落實「一帶一路」，原本禁止輸入內地嘅馬來西亞新鮮榴槤有望解禁，所以近日大批中資同港資都狂掃馬國嘅果園訂單，務求搶到頭啖湯。佢又話現時唔少內地人來港旅行，都會買新鮮榴槤食，享負盛名嘅「貓山王」榴槤自然最受熱捧。除咗內地客，佢亦指女士相較男士更鍾意榴槤，唔少女士甚至會食上癮，所以正開發一啲榴槤副產品，例如榴槤薄餅等，主打女性市場。
卓妮