政情：何君堯以美國作例 手銬鎖離席議員返位
話說立法會上周四通過由政府提出嘅《印花立法稅修訂條例草案》中止審議、休會待續有關議案後冇耐，就因為會議廳人數不足而流會，當時民主派全部不在席。建制派議員何君堯前日喺Facebook狠批有關行為係反智同破壞香港，又以美國為例，指可以用手銬扣離席議員返入會議廳開會。
何君堯以美國作例子，指喺美國議會內，「Sergeant of arms（正名為Sergeant at arms，議會警衞）」能夠用手銬將唔在席嘅議員帶回立法會，又話香港呢班議員要搞破壞嘅話，就要正式處理好佢。
點名鬧許智峯乞人憎
佢明言唔能夠容忍拉布行為，會考慮「出招」，要「小懲大戒」，更點名炮轟要求點算法定人數嘅民主黨許智峯當時是「搞搞震」，又形容許智峯喺要求點算人數後，自己走出會議廳嘅行為係「乞人憎」，批評許智峯行為不檢，陷立法會不義，令立法會聲譽受損，係不道德、無誠信，要記大過，「可以郁下佢都得喎」，例如動議譴責。