政情：許華傑擺電競擂台 引宅男出洞
電競業近年喺全球冒起，令打機成為新興行業。一向多計仔嘅中華出入口商會副會長許華傑（Michael）都趁熱鬧，早前同朋友夾份開咗香港第一間電競酒吧，將打機變成一場場正式比賽同表演。Michael話希望藉此吸引平時縮埋一角打機嘅青少年，走出來同社會接觸。
自言打機好渣 上唔到大台
Michael話呢個電競吧係正式打機比賽同表演嘅場地，台上有一對一、五對五的比賽，全程公開畀人睇，等打得叻嘅人威吓。早前就有一位唔係公開賽常客嘅後生仔同香港電競冠軍對打，結果贏咗，現場觀眾拍爛手掌，個個都好開心，呢位隱世高手當然都好滿足喇！
講起打機，佢自爆由細到大都冇停過玩，咁佢的級數如何？佢笑稱自己好渣，上唔到大台喎。雖然佢咁支持打機，但對兩個囝囝上網、打機都唔係完全冇限制，好似個仔上網買武器咁，都唔可以放任唔理o架！