政情：主席們話冇需要

區議員每月酬金約為三萬元，而區議會正副主席嘅每月酬金就較高，主席每月六萬一千多元，副主席就每月四萬六千多元。主席有主持會議嘅權力，加上政府官員諮詢各區意見，有時亦透過正副主席去了解區情，因此各區正副主席嘅位置，喺每屆選舉都惹來唔少明爭暗鬥。

反指要加多啲公務員做地區工作

據知，自去年起，有政府官員曾非正式咁問過個別政黨高層嘅意見，了解係咪應該增加多一名區議會副主席，主要係因為個別地區工作量比較大，但係亦有指未必係每個區都會增加副主席，正如現時未必每個區都有兩個民政事務助理專員咁，要視乎每區情況。

多名區議會主席都話冇聽過呢件事，仲對此有好多保留。西貢區議會主席吳仕福反問「加個副主席做乜嘢先？安撫我哋，大家分贓呀？」佢直指冇需要加多個副主席，反而應該加多啲公務員做地區工作，例如區議會秘書處得十幾個人，如果係大區有幾十萬人口，就根本唔夠人做嘢，又話與其加多個副主席，不如檢討調整每名區議員實報實銷開支。

南區區議會主席朱慶虹亦指「睇唔到需要」，佢話按照會議常規，主席無法主持會議時先要副主席代行，但自己一向係百分百出席，副主席都冇乜發揮到作用，「加多個唔知主要作用做乜？」佢認同區議會工作量係增加，但工作量係去咗委員會嗰度，並非副主席身上，如果要增加，要講得出做乜先得，「唔應該公帑當資源咁分配」。

沙田區議會主席何厚祥都話睇唔到有迫切需要加多個副主席，自己同副主席亦一向合作無間。至於元朗區議會主席沈豪傑就話地區冇太大聲音有呢個需要，反而覺得各區民政事務處應該加多啲人手，因為大區都唔夠人咁話。