中環出更：尹兆堅唔避嫌 繼續去探黃之鋒
「雙學三子」黃之鋒、羅冠聰、周永康因衝擊政府總部，以及反新界東北案十三名社運人士因律政司覆核刑期，早前被改判即時入獄六至十三個月。本報早前揭發民主派議員疑濫用公務探訪制度，編更輪流探十六人，立法會議員葛珮帆上周更喺立法會保安事務委員會上要求跟進事件。不過，民主派似乎未有收斂，適逢颱風卡努襲港，民主黨尹兆堅日前喺Facebook自爆，探望其中五人，包括黃之鋒同周永康。
仲探咗周永康等四人
卡努襲港，尹兆堅趁住打風前夕，喺上周六去探監。根據佢喺Fb嘅貼文，佢探望咗周永康、黃之鋒、梁曉陽、劉國樑同朱偉聰。五人當中，只有黃之鋒被囚於壁屋懲教所，其餘四人均囚於壁屋監獄。
上周五係黃之鋒廿一歲生日，當日亦係佔旺藐視法庭案宣判日，包括黃之鋒女友在內嘅一眾支持者，隔着犯人欄祝佢「生日快樂」，以及散庭後喺庭外向佢大唱生日歌。尹兆堅前日喺探望黃之鋒後，替黃之鋒轉述話多謝支持者為佢唱生日歌，又稱當日有聽到，惟當時未能道謝。此外，尹兆堅亦指黃之鋒呼籲市民關注其他在囚人士，包括與黃同年同月同日出生、因旺角暴亂而被判囚嘅麥子晞。
卓妮