中環出更：瑪麗工作45載 梁馮令儀難忘沙士
香港嘅醫護人員為咗病人盡心盡力，一向都好出名，有八十年歷史嘅瑪麗醫院，當然就有好多醫護間嘅小故事啦！早前醫管局瑪麗八十圖片展嘉許禮，唔少政商界都有出席，包括外號「放射科女王」嘅瑪麗醫院放射科部門前主管梁馮令儀，佢話喺瑪麗工作四十五年，最難忘就係沙士。
梁太話沙士爆發初期，放射科要幫手照肺片，需要二十四小時睇住，發現有事就要電腦掃描，自己當時夜晚冇乜瞓覺，通宵工作，每晚去急症室睇菲林，其實佢夜晚一向都瞓得好少，完全冇問題，但通宵幾日，就有唔少年輕醫生擔心佢太辛苦，爭住做通宵更。
一件小事亦令到佢哋可以做好消毒工作，梁太話當年一向係用紙袋入菲林，但係紙袋好容易穿，佢申請咗好耐先申請到資源訂造一批大膠袋，剛訂造好，沙士就出現，亦因為有呢批膠袋入住啲菲林，咁就可以用消毒藥水抹，啲膠袋仲夠分畀其他醫院用添！
施榮恆老婆瑪麗生B讚婦產科專業
律師會前會長黃嘉純同東華前主席施榮恆（Ivan），原來都同瑪麗醫院甚有淵源。黃嘉純話十多年前曾經試過被抽中，參與瑪麗嘅長期實驗，每隔幾年要去抽血驗血脂，以研究血糖過高，好彩自己嘅檢驗結果都係冇事啫！
Ivan就話太太當年係去瑪麗生BB，因為太太係高齡產婦，要特別諗過去邊度生，有朋友嘅孖胎唔足月，私家醫院都搞唔掂，最後去咗瑪麗醫院救番兩個BB，加上自己以往都聽聞瑪麗嘅婦產科好專業，令佢對瑪麗好有信心。
瑪麗醫院及贊育醫院管治委員會主席彭耀佳就話，瑪麗醫院嘅醫護人員真係好忙碌，病人需求愈嚟愈多，有時都會聽到啲醫護人員呻話想多照顧病人，但冇乜時間，覺得留喺公營醫院嘅同事，都好有使命感。
卓妮