政情：山頂補選 張宇人暗寸葉劉得閒

自嘲冇能力時間做區議員

自由黨成員、教育局前政治助理楊哲安尋日喺佢爸爸立法會前議員楊孝華及該黨主席張宇人陪同下報名參選山頂區補選。對於新民黨主席葉劉淑儀積極考慮參選，張宇人暗寸葉劉咁得閒做區議員，而葉劉尋日就封口唔講補選。

對於葉劉積極考慮參選，張宇人指自己嘅年紀較葉劉大，同葉劉一樣身兼黨主席、行政會議成員同立法會議員，覺得好辛苦，好尊重同埋敬佩葉劉想參選，但就自覺冇咁嘅能力同時間，因為做區議會嘅工作好「困身」，而且市民對區議員嘅要求好高。

尋日喺另一個活動見到葉劉，問到有關山頂區補選嘅事，佢就封口唔講係咪出戰。咁幾時報名？佢就話：「我第日話你知，報名嘅時候話你知啦」。唔知係咪暗示即將會報名呢？