政情：陳恒鑌氹老婆甩轆 生日已過 禮未到
立法會議員陳恒鑌（Ben）早前同太太去澳門慶祝結婚九周年紀念同太太生日，仲一早訂購最新推出嘅智能手機做禮物，但佢竟然大嘆「蠢咗」，唔知有咩甩轆事？
訂智能手機呻「蠢咗」
阿Ben話，早前佢趁部智能手機發售，即刻喺網上訂購，打算送畀太太做結婚周年兼生日禮物。點知部電話唔似以前咁難買，唔少商舖有大把現貨賣，但佢喺網上訂購嗰部反而過咗太太生日都仲未收到，難怪佢會呻自己蠢咗喇！
講開又講，阿Ben讀書時曾經買賣二手電話賺外快，現時亦收藏唔少舊電話，可以話對電話行情非常熟悉。相信今次佢都得到教訓嘞！
雖然阿Ben趕唔切送上禮物，但佢同太太短暫離開香港一日半，去澳門食嘢、睇表演，享受二人世界，已經好舒服。不過，佢哋嘅一對仔女就唔開心，視像通話時喊晒口話掛住佢哋，睇嚟下次去玩都要帶埋仔女一齊去先得喎。