政情：委員會掌權戰 建制冧友 泛民難突襲

立法會大會本周三復會，十八個事務委員會亦將於翌日選出正、副主席，而尋日中午係議員報名加入各個事務委員會嘅最後限期。今次建制派加入事務委員會事宜由民建聯議員陳克勤負責統籌，亦係佢負責同民主派會議召集人莫乃光商討協調事宜。不過唔知係咪因為民主派「突襲」有前科，為咗安全起見，建制派仍然係發動「冧友」，除咗原本由社會福利界議員邵家臻任主席嘅福利事務委員會，建制派人數只係比民主派多兩人外，其餘事務委員會建制派嘅人數都遠超民主派。

而喺十八個事務委員會當中，最多人加入嘅係交通事務委員會及保安事務委員會，各有四十四名議員加入，其次就係有四十三人加入嘅發展事務委員會。而政制事務委員會、食物安全及環境衞生事務委員會亦各有四十二人加入。早前已經講過，喺兩派陣營協調之下，食物安全及環境衞生事務委員會主席之位將交番畀建制派議員做，原本出任主席嘅民主黨黃碧雲（一舊雲）成為協調下嘅「犧牲品」，唔知建制派係咪怕一舊雲唔甘心，所以都係要踴躍參與呢？

朱凱廸入晒18個委員會

睇番個別議員加入委員會情況，加入最多事務委員會嘅係議員朱凱廸，全數十八個都入晒。除非朱凱廸識分身術，否則都幾難應付。而加入得最少事務委員會嘅就係衞生服務界議員李國麟，佢只係加入咗房屋、衞生同埋食物安全及環境衞生三個事務委員會。而建制派中最「積極參與」嘅就有民建聯議員李慧琼同梁志祥、新民黨議員葉劉淑儀同容海恩，以及獨立議員何君堯，佢哋都加入咗十三個事務委員會。而拉布常客、人民力量議員陳志全就加入咗十四個，係繼朱凱廸外加入最多委員會嘅議員。