中環出更：陳浩天嘲戴耀廷係「支爆論」者
大學校園早前爆出港獨思潮，香港大學法律系副教授戴耀廷尋日出席城市大學一個論壇時，話中國未來發展有很多可能性，包括崩潰（即「支爆論」），但佢話咁樣對香港未必係好事，因為屆時唔知香港會歸入邊一個政治集團。戴耀廷崩潰言論一出，即被支持港獨嘅香港民族黨召集人陳浩天笑佢係「支爆論」者。
指「香港可能併入廣東國」
一直唔表態支持港獨嘅戴耀廷話，中港關係發展可能性很多，可能係香港內地化，或繼續奉行一國兩制，亦可能係中國崩潰，「香港可能併入廣東國」，但咁樣對香港嘅風險最大，中國任何變化都會影響香港。
陳浩天聞言即笑指戴耀廷係「支爆論」者，佢話香港有自己嘅邊界、貨幣和語言等，距離實際獨立只欠一部憲法同埋一個民選政府，故佢認為爭取香港民主嘅民主派，與支持港獨者所追求嘅本質係一樣。
同場嘅民主黨主席胡志偉就話，民主派喺香港回歸後一直爭取喺建制架構內落實民主，倘若現時建構一個追求港獨嘅新框架，恐會影響群眾參與。不過，佢認為建構本土意識可考慮，以區議會選舉為例，如市民積極參與投票，就唔會將社會主導權拱手讓予建制派。
卓妮