天眼攝偷貼士 餐廳全城緝兇
【本報訊】打工仔底薪唔高，都希望以佣金或貼士幫補。但一間餐廳「貼士箱」內約二千元的貼士，卻在職員出糧日未正式營業前，被一名擅闖的四眼男用三十秒偷走，職員滿心歡喜以為可攤分貼士，最終卻要將四眼男偷竊的CCTV片放上網，希望借助網絡力量全城緝兇。
片段前日（6日）被上載到「巴打絲打 Facebook Club」群組。影片所見上午十時許，當時該餐廳尚未打開門做生意，店面空無一人。一名穿黑衣的四眼男由大門直入店內櫃面，純熟地打開枱上供客人畀小費的「貼士箱」，將入面的紙鈔袋進褲袋就離開。
偷錢過程30秒完成
由於貼士箱沒有上鎖，整個過程不消三十秒便完成。職員事後翻查CCTV發現，並將片段上網希望捉拿小偷：「全城緝兇，原本全部同事都開開心心，今日出糧分貼士，就係呢條友仔……偷晒同事D貼士，麻煩各位巴打絲打幫忙找到此人！」
不少網友認為，案中小偷非常熟手事有蹺蹊，「其實有無諗過，點解佢會知嗰個位有錢攞，好似好熟手咁，會唔會同自己人有關呢？」有人又指，當時店面無人又無做好防盜措施，才令小偷有機可乘。
警方發言人指，案件列作「盜竊」，交由深水埗警區刑事調查第七隊跟進，暫時無人被捕。