政情：暗寸白鴿黨又傾又砌 周庭火併胡志偉

話應該反思有冇其他路線

胡志偉解釋，喺香港社會內，若要解決一啲畀中央政府影響嘅事情，例如香港政治制度嘅安排，該黨會用盡各種方法，向中央政府或有關部門發表意見。但同場嘅周庭就認為，某啲光復民主派喺過去十幾年「又傾又砌」，但最終冇太大嘅結果，反而應要反思會唔會有其他路線，但佢又認為想與中央表達意見係好事。

眼見周庭暗寸白鴿黨嘅路線，胡志偉隨即反駁，指其他路徑同樣並存，認為無需要排斥唔同路線，周庭亦回應話明白無需要排斥唔同路線，但當中係有互相影響嘅作用，依家中共明顯以「打擊分裂主義」為名，實質係削弱民主力量。見對方咬得咁緊，胡志偉最後指民主派嘅共同目標係中央政府，面對中央政府喺香港收緊權力嘅壓力，唔應該再將民主派分裂。

辣完胡志偉，周庭又無啦啦話中央政府唔處理香港學生自殺問題，搞到畀人寸番轉頭。事關佢話擔心中央會對香港青年做統戰工作，認為中央唔係做緊香港青年關心嘅工作，只係拉攏青年人愛港愛國，仲舉例，話香港青年人關心自殺問題，反問中聯辦喺事件上做咗啲咩？

周浩鼎：幾時都要保持克制

聽到周庭咁講，民建聯嘅立法會議員周浩鼎就話自己「搖頭嘆息」，仲批評對方「上綱上線」，而且仲引述胡志偉，話任何時候都應該要保持克制。

自由黨嘅深水埗區議員李梓敬就話香港人對中聯辦嘅角色有誤解，佢認為中聯辦喺有需要時可有角色。

佢仲話喺選舉中，非建制派有民主動力作協調平台，而建制派亦需要有平台，認為中聯辦喺香港有角色，負責進行聯絡同協調。