中環出更：游蕙禎唔公開撐人 驚變死亡之吻
立法會四區補選將於明年三月進行，非建制派對出戰人選仍存在分歧。被法庭取消立法會議員資格（DQ）嘅青年新政游蕙禎，日前喺Facebook上透露自己對補選仍在商討考慮中，佢尋日進一步解釋，係因為仍在尋找有冇相近政治光譜嘅人打算參選，但佢強調唔會公開協助其他人參選，認為現時自己身份尷尬，公開支持將會係「死亡之吻」。
同梁頌恆唔對嘴
游蕙禎尋日話，聽聞有本土派人士考慮出選，佢形容自己對某人嘅認可是「死亡之吻」，唔會明言支持某位候選人，但會私下幫助。佢又認為重要嘅係，要將被DQ嘅理念重新帶入議會。
雖然游蕙禎話仍在考慮係咪參與補選，但同樣被DQ嘅青年新政梁頌恆尋日卻指青年新政唔會派人參選，亦睇唔到參加補選嘅意義。但佢透露，若果議會係真正屬於人民嘅時候，先會參與。游、梁雖然屬同一個組織，但對於補選卻不對嘴。
卓妮