轉乘鐵路 一票難求 旅客徬徨
【本報訊】廣深高速公路癱瘓，北上直通巴士昨被迫暫停服務，本港旺角維景酒店附近的直巴集散地大亂，不少市民到達車站才發現「冇票賣」，亦有人要急急轉乘鐵路或循水路離港。但市民趕到深圳轉乘鐵路亦前路難行，往廣州的和諧號動車一票難求，昨晚八時前的車票於午後已全線售罄，即使願意深夜出發亦要大排長龍，現場估計一度有逾千人圍繞鐵馬打蛇餅。
有人焗循水路赴佛山
昨日由旺角出發的直通巴，只有前往深圳關口的班次如常，但旅客上車後卻要自求多福，因為分分鐘「前無去路」。譚先生昨早乘搭七時許往開平的直通巴，抵達深圳灣口岸後慘吃閉門羹，「另一架車塞住咗搞到冇車上（開平），所有人惟有原車返轉頭，搞咗三個幾鐘！」
關先生與父親昨原定乘搭下午二時許的直通巴到佛山，到車站才知道班次取消，「完全無通知過我哋取消，打個電話或者公司網頁講聲都好！」最後他們要轉乘的士到尖沙咀中港碼頭，乘船前往佛山。
年過八旬的胡先生則決定退票，稱逾六十年來首次因塞車留港過節，「大小二便嗰兩樣都難搞啦，好難頂嘅嘛老人，我哋咁嘅年紀！」來自佛山的陳先生亦到票站取消訂位，隨即趕赴紅磡乘搭往廣州的直通車，「之後再駁地鐵返佛山，惟有避開唔搭大巴，如果有飛機都肯坐呀！」
有前線司機透露，黃金周廣深高速癱瘓並非新奇事，但今年格外「墟冚」，直巴公司只能見步行步，按「回車率」調動班次。
