超市男掟狗復腳踢 警方跟進
【本報訊】男子對狗狗又掟又踢，被網民圍剿兼人肉搜尋！網上討論區、YouTube與Facebook瘋傳一段身穿牛記笠記男子怒掟小狗出超市的短片，片中小狗被掟落地後，男子再上前補多兩腳將牠踢走，鏡頭令人看後都叫出：「可怒也！」警方表示，屯門警區刑事調查隊第九隊正了解事件。
狗主着超市職員「睇住」
網上消息指出，該宗懷疑虐狗事件於屯門寶田商場發生，事緣有狗主着超市職員代為「睇住」小狗而惹踢狗男不滿，遂以暴力驅狗。懷疑虐狗短片瘋傳後，網民盛怒，直斥踢狗男無人性，正發動人肉搜尋起底，亦有人透過「電子報案室」報案。
片段在前天（23日）開始在YouTube傳遞、名為「屯門賤男虐狗」短片，到昨天（24日）被轉載到多個討論區及Fb專頁，其中一個貼文上載了約一小時，已惹來逾一千二百個嬲嬲。片中看到一位中年男子，突然從收銀櫃位抱着狗狗走出，然後半脫手半有意下將狗狗掟落地，再將正反肚的小狗踢出入閘位，肉緊的他口中唸唸有詞，自己亦一度失平衡跌倒，可憐狗狗驚恐地逃離。
網民憤怒 已有人報警
雖然不少網民不明白為何狗主會要求超市職員代為監管小狗，但更多網民對踢狗男行為感憤怒：「佢（男子）咁大舊，恰隻咁細嘅狗，咩人嚟呀？下次綁隻洛威拿喺度等佢，睇吓佢有無咁神？」同時，網民透過轉載短片望能夠成功將踢狗男起底，亦有網民指已經有人報警，希望將踢狗男繩之於法。