政情：港英餘孽大合奏 肥彭嫌棄舊電池 點名黃之鋒接棒
末代港督彭定康（肥彭）呢幾日嚟香港宣傳佢嘅新書，又乘機出席活動同演講，對香港事務指指點點。尋日佢出席香港民主促進會嘅午餐會，有「李漢奸」之稱嘅民主黨創黨主席李柱銘、「民主阿婆」前政務司司長陳方安生等都有撐場，真係一班港英餘孽大合奏。除咗一班舊電池，香港眾志周庭、林淳軒都有到場，肥彭見到周庭佢哋，就特登問候因衝擊政府總部而被判坐監嘅香港眾志秘書長黃之鋒喺獄中嘅情況，仲力讚黃之鋒添！唔通肥彭都知道啲舊電池已經冇用，所以要埋呢班年輕人同學生哥堆？
又喺度指指點點
肥彭尋日嘅午餐會，包括李漢奸同民主阿婆等唔少港英餘孽都有嚟撐場，另外仲有公民黨梁家傑同該黨現任立法會議員郭家麒、立法會資訊科技界議員莫乃光、南區區議員司馬文、立法會前議員譚香文、新民主同盟陸耀文、民主黨前主席劉慧卿。而財政司司長曾俊華（鬍鬚曾）在任時嘅政治助理羅永聰，同運輸及房屋局前副局長邱誠武都有現身。至於年輕一代方面，除咗周庭同林淳軒之外，香港大學學生會前會長馮敬恩同學聯前副秘書長岑敖暉亦有出席。
雖然香港已經回歸二十年，但肥彭不時都會「回魂」，返香港搞搞震。正所謂不在其位不謀其政，但肥彭尋日喺午餐會上呢頭就話嘗試盡量唔向特首提議應該做乜嘢同唔應該做乜嘢，但轉頭就話希望特首林鄭月娥有能力團結社會，要向中聯辦表明唔好干預香港事務，向中央表明喺香港討論民主並唔係顛覆國家，仲叫林鄭游說內地領導人，唔好將香港人睇成異見人士同製造麻煩嘅人喎。一個前殖民地嘅高官又喺度指指點點。
肥彭之後喺一個訪問被問到對昔日嘅公務員依家已成領袖有乜嘢睇法，佢就點名話民主阿婆、前特首曾蔭權同鬍鬚曾都係好公僕，仲話民主阿婆係最佳公務員添！佢哋都係肥彭當年嘅舊部，但係咪好公僕真係見仁見智喇！
話自己唔撐港獨
雖然肥彭口口聲聲話唔撐港獨，但就話會支持追求民主。佢見到周庭、林淳軒時就問到黃之鋒等人喺獄中情況，仲力讚黃之鋒係佢遇過最堅持原則嘅年輕人，係其中一個最傑出嘅年輕人，相信未來仍然會發揮影響力咁話。
唔通肥彭都認為香港眾志呢班後生仔有影響力過李漢奸、民主阿婆嗰堆舊電池，所以轉軚拉攏班年輕人呢？不過怕就怕班後生仔都嫌棄佢哋呢啲港英餘孽，唔想騷佢喇！