斯文嘅女仔的確吸引，之但係男人天生花心，如果女仔個性單一嘅話，相處耐咗，難免令男人覺得缺乏挑戰性及新鮮感。不過如果對象係南韓氣質模特兒安芝英的話，無論相處幾耐，相信男士們都一定唔會感到生厭，事關佢外表斯文，骨子裏相當調皮，幾時都咁有新鮮感啦！
由於模特兒嘅工作要展現出優雅形象關係，故此往往都係外形斯文嘅模特兒較為吃香，因此氣質斯文、身材玲瓏浮凸嘅安芝英，2009年首次喺首爾車展上以車模身份登場時，憑住優雅斯文嘅外表，加上性感無比套裝示人時，即時引起大家嘅注目。雖然一出道便獲得好評，但其實佢並未諗過以模特兒作為自己嘅職業，原來當時仍然在學嘅佢，夢想成為一位工程師，為咗可以圓夢而埋頭苦讀。不過由於苦讀生活壓力太大關係，加上佢希望減輕家庭負擔，故此喺朋友推薦下，做兼職攝影模特兒搵錢，憑住斯文嘅氣質好快取得人氣。
不過阿妹坦言自己嘅性格一啲都唔斯文，反而相當好動，早喺讀書時佢鍾意打棒球、籃球同踢波，而同朋友相處時，佢更係擔當一個百厭妹嘅角色經常整蠱人。既然係咁，點解喺鏡頭前佢會如此斯文呢？阿妹表示初入行時，因為自己乜都唔識，故此工作時都會粒聲唔出，聽從攝影師嘅安排，結果喺攝影師嘅鏡頭下，令佢意外地成為一位氣質斯文女孩，並且獲得好評，自此佢就變成斯文氣質女郎。不過佢補充指，呢種性格僅限於鏡頭前，當佢跟屋企人或朋友相處時，心態放鬆嘅情況下佢便會回復真面目。
一直夢想成為工程師嘅安芝英，兼職模特兒一段時間後，漸漸愛上咗呢行，並希望成為自己未來嘅事業，而呢個時候模特兒事務所正好問佢有冇興趣成為全職模特兒，佢便一口答應。跟住佢接受正規模特兒嘅訓練，而且更加着重打扮，工作接個不停。面對種種嘅工作安排，佢坦言仍然最喜歡攝影模特兒嘅工作，佢解釋唔係因為怕喺大場合演出，而係因為攝影模特兒形象百變，將佢從未發現嘅一面展現畀大家睇。
不過近年佢開始展現真本性，即係調皮嘅個性，例如化身成動漫女角色，配合活潑嘅表情，帶畀大家耳目一新嘅感覺，就連佢自己亦對呢輯寫真感到相當滿意。喺忙於攝影工作同時，佢並未丟低其他工作，好似佢先後喺釜山、首爾等多個車展上登場，同時又踩入賽車女郎界，喺南韓多場賽事中化身成性感女郎，而佢每次出場例必成為賽場上焦點之一。經過多年嚟喺模特兒界工作，有人問佢會唔會覺得厭倦，佢坦言有時都會感到厭倦，但係佢覺得既然已決定以模特兒作為自己嘅事業，就要堅持做落去，為咗令自己每次演出都保持動力，佢偶爾都會展露真本性，希望令自己及身邊人覺得開心啲。
簡介：雖然安芝英初出道時，形象斯文大方，迷倒唔少男人嘅心，但係要令男士有新鮮感，始終都要有多層次嘅表現至得，因此近年佢開始展現調皮嘅魅力，從而令自己有更多元化嘅發展。如果大家想了解佢多啲，就要Click入呢個網睇睇喇！
網址：http://cafe.daum.net/whiteJY
出生地：首爾
身高：174cm
三圍：34、24、34
撰文：魂