本港人口老化嚴重，勞工及福利局局長羅致光尋日發表網誌，提到以現時資助安老院舍嘅需求率推算，二○三七至二○四七年嘅十年間需要興建約四百五十八間資助安老院，仲話以依家約每年只建成兩至三間安老院嘅速度，喺十年間要興建咁多間資助安老院，似係不可能完成嘅任務。話時話，外界已炮轟政府龜速建安老院，令有啲長者等到死都未有位，羅致光依家仲講埋乜嘢不可能完成嘅任務，係咪想卸膊先？
