政情：陳浩濂 蕭嘉怡倒貼入熱廚房
入得「熱廚房」做問責官員，除咗工作難啃之外，仲會招致金錢損失o架！好似早前勞工及福利局局長羅致光曾自爆出任問責局長前，賣晒手上所有股票，因此賺少七位數字，原來財經事務及庫務局副局長陳浩濂（Joseph）同政務司司長政治助理蕭嘉怡（Kathy），因為加入熱廚房而辭去中西區區議員嘅職務，由於要結束議員辦事處搞到要倒貼，Joseph就入肉啲，要倒貼六位數字呀！
羅致光早前透露，自己出任問責局長前，已經賣清手上股票，所蝕金額等同半年局長人工，以調整後局長月薪逾三十三萬港元計，即係佢賺少超過二百萬港元。
辭任區議員 自掏荷包結束議辦
至於Joseph，除咗放棄銀行界嘅高薪厚職外，仲要結束自己原本喺中環嘅議員辦事處，每月租金萬幾蚊，租約到年底，加上傢俬搬遷費，以及其他仲有約在身嘅電話費、上網費，連同兩名分別月薪萬幾蚊嘅助理代通知金同遣散費，Joseph總共倒貼超過十萬蚊o架！Joseph助理嘅代通知金同遣散費完全冇對沖強積金，而且兩名員工依家都已經搵到工，咁樣聽落Joseph真係一個唔錯嘅僱主。
陳倒貼逾十萬 蕭相對損失較少
Kathy就相當幸運，只係倒貼咗五位數字啫！因為佢嘅業主願意提早結束租約，所以租約方面就冇乜損失，而且議辦一直都係用二手傢俬，本來已經比較舊，甚至有啲爛，所以都轉為送畀人或者唔要，不過電腦就有買番嚟自用。至於員工方面，一個就一早已經搵咗嘢做，原本已經打算轉工；另一位就只係做咗幾個月，所以都有賠番一個月糧畀嗰位員工，加上電話費、上網費、傳真費嘅合約簽得比較耐，所以整體倒貼五位數字，損失相對較少。
雖則係要倒貼，而陳浩濂倒貼得較多，但以副局長月薪超過二十萬元，政助嘅月薪都超過八萬元嚟計，佢哋返一個月工就夠回本有凸喇！