中環出更：鄧家彪換圓框眼鏡扮偽文青
近年潮流古老當時興，無論真偽文青都會換上圓框嘅「文青眼鏡」示人，本身係大近視嘅勞工顧問委員會勞方成員鄧家彪（Bill），近日都換上一副圓框眼鏡，不過佢就否認係轉走「文青風」，反而話因為深近視要揀細啲嘅眼鏡框，估唔到咁啱得咁蹺畀人當咗偽文青！
千幾度近視 換細鏡框遮圈圈
阿Bill眼鏡嘅鏡片近年愈換愈細，亦由方框變圓框，阿Bill話自己唔係趕潮流嘅人，而係因為自己雙眼分別有成千幾度近視，如果用愈大愈闊嘅鏡片，外圍就愈厚，為咗眼鏡唔使睇落一圈圈，所以眼鏡框先至愈換愈細。
除咗阿Bill之外，立法會議員麥美娟（Alice）亦都係大近視。Alice就大爆，有一次阿Bill整爛咗眼鏡，佢就伸出援手借隱形眼鏡畀阿Bill，等佢可以唔使盲舂舂做人。
卓妮