中環出更：首次整月餅 陳茂波自嘲阿茂
下個月四號就係中秋節喇，唔少人已經開始整或者買月餅，財政司司長陳茂波（波叔）尋日出席由多個團體合辦嘅整月餅活動時，亦處男下海，首嘗「阿茂整餅」，竟然又整得唔錯喎！
波叔尋日上晝參加由香港九龍潮州公會及多個團體合辦嘅「月圓中秋情滿西九」活動，跟整餅師傅學用芋頭及蓮蓉作餡料整潮州月餅。唔知波叔係咪一早諗到自己會畀人笑係阿茂整餅，所以一開場佢即幽默自嘲係「阿茂」。佢笑言今次係第一次整月餅，見佢都幾留心聽師傅教嘅步驟，期間都冇出錯，整得似模似樣。整好之後波叔亦幾滿意，話自己平日喺屋企唔識煮餸，但今次終於可以返屋企同老婆講，阿茂都識得整餅喇喎。
「玩具大王」蔡志明長女蔡加敏（Carmen）都有出席。卓妮見佢整出嚟嘅月餅符合師傅所講，搓得愈圓愈靚，原來Carmen已經唔係第一次整月餅o架喇，因為佢喺媽媽蔡李惠莉創立嘅教育城內，都有教過小朋友整3D月餅，成個月餅係立體公仔模樣，今次搓圓形可謂易如反掌，一啲都難佢唔到。
蔣麗芸細個唔敢煲蠟怕毀容
Carmen仲透露中秋節最鍾意食奶黃月餅同龍眼，唔知係咪食得多，佢大個咗雙眼真係特別精靈啲。身為玩具大王個女，佢哋中秋節又係玩乜嘢玩具嘅呢？Carmen就話媽咪會教佢哋親手造燈籠，包保獨一無二又有節日氣氛，好懷念呀！
轉頭仲見到立法會議員蔣麗芸同佢老公梁海明以及深水埗區議員鄭泳舜。蔣麗芸笑言細個唔夠膽煲蠟，因為煲蠟太危險，一唔小心仲可能會毀容o架，所以都係唔好喇，尤其女士，保持靚樣好緊要o架嘛！
卓妮