政情：何偉權樂助更生 寫書講見聞
俗語話「一失足成千古恨」，尤其係青少年經常因為一念之差而身陷囹圄，抱憾終生。中華廠商聯合會（廠商會）最近搞咗個徵文比賽，畀中學生透過觀看懲教署改編三名在囚人士真實故事而拍攝嘅三部微電影，等學生寫出心中感受，從而灌輸正向價值觀。
負責呢個項目嘅係廠商會社會及公益事務委員會主席徐炳光，仲有商界助更生委員會主席何偉權（Ken）。Ken對於防止青少年犯罪一直好上心，佢話呢個比賽設有高額獎金，不過獎金係一回事，主要係想畀中學生知道咩叫對錯，而犯錯係要付出沉重代價。
講起寫文章，Ken都係寫得之人，佢兩年前已經出過一本書，閒時仲會寫埋書法。佢笑笑口話，最近天氣熱辣辣，佢索性邊度都唔去，匿埋寫第二本書，總結佢十幾年來助更生嘅所見所聞。本書大約三萬字，依家已經寫咗四分之三，希望今年年底前可以完成。