政情：黎年自我隔離 保廉署形象
前申訴專員黎年尋日出席一個分享會時大談管治問題，作為前高官，曾掌管廉政公署、貿易署等政府部門嘅黎年又提到，自己九十年代出任廉政專員時生活上有大改變，就係多咗返屋企食飯、斷絕應酬，除咗因為冇人敢請佢食飯，佢亦要自我隔離，避免影響機構形象。
自爆做過監製拍廣告
黎年仲自爆，原來佢曾經做過廣告監製。其實佢所講嘅只係掛名監製，因為佢喺八十年代出任廉署社區關係處助理處長時，要負責安排教材及利用唔同媒體宣傳防貪，所以佢當年就要同廣告公司一齊度橋出廣告宣傳。
佢又話，宣傳防貪都要用唔同手法去推銷，先吸引到唔同觀眾，而佢亦都曾經遇上拍攝困難。不過佢就提到，有關廣告推出後好少人提起，慨嘆廣告唔成功。事隔多年黎年都仲記得，睇嚟佢都仲好介懷。
而談到近期嘅興德學校校政混亂同鄰舍輔導會裁員風波，黎年認為資助機構係用政府資源，自然背負住市民期望，認為可視此為契機，去改善現有嘅制度喎。