政情：中總搞青年音樂會 韓星夠照
香港中華總商會（中總）連續第三年喺十月舉辦青年音樂會，邀請中、港、韓三地年輕歌星喺紅磡香港體育館演出，中總會長蔡冠深被問到會唔會怕請韓星同十一主題唔夾時，就笑言中秋節都唔一定要食最傳统嗰種蓮蓉月餅，食雪糕月餅同冰皮月餅一樣可以了解典故嘅，最緊要吸引到年輕人同做慈善，大家開心喎。
蔡冠深話最初佢哋係想吸引本地年輕人，點知原來好多內地同韓國年輕人都嚟參加，可謂喜出望外，其中韓星受歡迎程度更差啲連鐵馬都推冧埋。佢仲話前一年音樂會試過有女生企咗喺佢個位度，佢請對方讓路時先知道對方係韓國人，笑言以為大家因為捧韓星場所以先舉住韓文嘅牌。
蔡冠深：免費反而唔珍惜
除咗韓星，佢哋今年亦請咗本地年輕歌手同內地受歡迎男組合一齊演出，蔡冠深直言要平衡同考慮資金、年輕人口味、歌手受歡迎程度同吸引力唔簡單，佢哋都揣摩咗三年。佢又話籌備文藝晚會加青年音樂會嘅成本需一千二百萬元，而分別一百蚊同二百蚊嘅象徵式入場票價係必要，因為免費畀大家反而唔珍惜，相反畀咗錢即使只係一百蚊，大家都會盡量出席。