中環出更：政壇失意 情場得意 劉小麗墾丁踏浪拖男伴
俗語有話「政壇失意，情場得意」。今年七月被取消立法會議員資格嘅劉小麗雖然失去議席，但就似乎另有收穫。卓妮收到讀者報料，指喺台灣南部墾丁沙灘見到劉小麗同一名男子喺沙灘上拖手仔，小麗唔知係咪怕條裙被海水沾濕， 一度拉高條裙，露出白滑大腿，又依偎喺神秘男肩上一齊睇相機入面嘅相，兩人親暱猶如情侶。卓妮第一時間致電問佢係咪蜜運中，小麗證實自己喺毗鄰墾丁嘅高雄，一聽到問神秘男子係咪男朋友時，就立刻收線。
十指相扣 甜笑冧到爆
睇番啲相，着住黑色露臂連身長裙嘅小麗，同一名身穿黑色POLO恤、卡其色長褲、戴眼鏡嘅男子，喺沙灘上玩樂。該男子樣貌斯文，左手揸住相機，右手仲要同小麗十指相扣，兩人時而拖手對望，時而一齊望住拍岸嘅浪花，小麗就全程甜笑，真係甜到爆。
現年四十一歲嘅小麗仍未結婚，佢曾經自爆一直都有感情生活，但都未能修成正果。嚟識佢嘅人都以為會同一個斯文女仔拍拖，試過有男朋友送花花髮夾畀佢，要求佢戴上，結果搞到分手。佢都試過扮依賴，曾經要求男友幫佢換屋企燈膽，點知對方唔識換，結果都係要自己郁手，總之就一直未遇到啱嘅人。
網民揶揄：記得還人工
今次小麗拍拖秘照曝光之後，旋即引起網民熱議。有口痕網友就提醒佢，去旅行之餘要記得交還欠立法會嘅人工，亦有網民擔心佢好似棄保潛逃台灣嘅「旺暴女」咁，唔返香港找數。
講開又講，今年農曆新年期間已有術數師為當時仲係立法會議員嘅劉小麗預測雞年運程，話小麗雞年流年不利，不過佢會有桃花運，真係幾準喎！唔知小麗今次拍拖會唔會開花結果呢？
卓妮