政情：港島補選新民黨憂再現容海恩2.0
青年新政游蕙禎同梁頌恆因宣誓風波被取消立法會議員資格，令新界東同九龍西嘅議席出現空缺，其後再多四人遭褫奪議員資格後，現時連港島區都需要補選，政圈傳出新民黨將加入戰團，代表建制派出戰港島區，借補選為黨內第二梯隊練兵，藉此培訓接班人。不過，有新民黨中人表示，容海恩都喺選舉前空降新民黨，仲喺新界東成功進身立法會，擔心港島區補選又再出現容海恩2.0，再次打擊黨內士氣囉！
黨內主流睇好陳家珮
新民黨主席葉劉淑儀喺特首選舉後已向黨友表明，下屆立法會選舉傾向為黨友抬轎，今次因香港眾志羅冠聰被取消議員資格而要進行港島區補選，可謂提供大好機會予新民黨練兵，即使贏唔到議席都可以為接班人提高知名度，所以該黨極力爭取落場資格並非無道理。而南區區議員陳家珮喺上年立法會選舉就排葉太名單第二，更曾代葉太出席選舉論壇表現亮眼，不過佢係咪最大機會接棒就仍然未知。
有新民黨中人就指出，雖然黨內主流將陳家珮睇高一綫，但該黨喺港島區只有兩名區議員，當中灣仔區議員李文龍同樣有機會，而且佢近期表現更為落力，據聞已積極考慮參選，所以葉太接班人選仲有未知數囉。
空降代表損內部士氣
不過，新民黨內部最關心係有冇人空降，事關葉太至今仍未明言由邊個出戰，令到唔少黨員擔心會好似上年容海恩一樣，選前半年空降新民黨繼而代表出選，直言做法對內部士氣造成大損害，希望可以確立由黨內區議員接班，令黨內年輕人睇到晉升階梯咁話。
除咗葉太接班人，容海恩嘅議席同樣令到新民黨關注，甚至可以話擔心，因為容海恩一向以傻大姐姿態示人，過往更被彈唔熟民情，相反唔少立法會新人經過一年洗禮都慢慢上手，尤其是唔少同容海恩一樣擁有法律背景嘅新人，佢哋不時喺法律角度談論具爭議性議題，有比較之下難免令到新民黨黨員擔心。
有新民黨中人直指，因立法會長期對立，導致建制派視立法會如戰場，選舉期間落力送新人入議會只為加強彈藥，若果議員喺議會中表現過於錫身就會辜負咗建制派嘅心血，下次選舉都難再得到佢哋出力幫手拉票咁話。其實建制派不乏人選，好似工聯會鄧家彪早已為新界東補選磨拳擦掌，可能會競逐下屆立法會選舉，難怪容海恩嘅黨友都會感到擔憂喇！