中環出更：田北辰呃金絲猴 被咬收場
本身係全國人大代表嘅立法會議員田北辰，近日去咗內地考察，隨團去到湖北神農架林區，睇國寶金絲猴，仲貪玩去呃金絲猴添，搞到被咬咗一下，好彩冇受傷咋！
田北辰話金絲猴好聰明，有啲似人類咁，如果你同啲金絲猴握手，之後攤開隻手有花生，金絲猴就會好開心，但如果你同佢握完手，但係攤開手冇花生，金絲猴就會對你有敵意o架啦。
好彩冇受傷
當日佢同金絲猴影咗一陣相，之後派晒啲花生，又覺得影相未影夠，於是就試吓呃金絲猴，睇吓會有乜嘢反應，握完手後冇花生，佢已經發現金絲猴個樣唔多妥，再嘗試摸該隻金絲猴時，金絲猴就咬咗佢一啖，不過都係好輕力啫，田北辰都冇受傷。
佢仲教路，其實如果你身邊冇花生，只要唔好去同金絲猴握手，佢哋都唔會對你有惡意嘅。睇落佢今次考察都玩得幾開心喎。
卓妮