政情：音樂世家 嚴重光唔識玩樂器
被喻為「島嶼的鑽石」嘅台北愛樂管弦樂團，下個月將首次喺香港文化中心作大型公開演出。主辦機構港澳台灣同鄉會尋日舉行宣傳騷時，台北經濟文化辦事處處長嚴重光都現身支持。講起學樂器，原來嚴重光出身音樂世家，但就唔識玩樂器喎。
試過玩胡琴 點知好難拉
嚴重光話爸爸係軍人，但係好有才華，唔止識胡琴、小提琴、鋼琴同簫等樂器，仲識寫書法及畫國畫。但係佢就唔識，因為細個屋企環境唔好，大個之後佢試過買一把胡琴練吓，以為自己應該有天分，但原來胡琴好難拉，笑稱天分都係假，要苦練就真。
同場仲有同鄉會會長林華琴（Judy）、樂團團長賴文福同駐團指揮林天吉等人。Judy話呢一場「為愛響起」慈善音樂會係同鄉會成立廿幾年來，首次喺香港舉辦嘅大型慈善活動，屆時將有六十幾位樂團成員來港演奏，免費請市民入場觀賞。扣除成本後餘款將捐畀慈善機構「培苗行動」，以資助內地貧困學生教育。