探射燈:回收車霸路 累毗鄰商戶執笠

回收車霸路經營,毗鄰商戶慘遭拖累至「執笠」!各區湧現回收商以貨車作「零租金」回收點,惹來蚊蟲孳生、噪音問題,更構成安全隱患,連累「真金白銀」繳租的商舖大受影響。其中在荃灣,有商戶大嘆生意大跌三成,更有食肆因此結業,而香港仔亦有音樂中心為減輕蝨患,需自資四萬元更換地氈;尖沙咀亦有商廈業主直指,街道現淪為「露天垃圾站」,擔心顧客因此止步。區議員均直斥部門執法不力,有損營商環境。

「我哋做長者生意為主,但啲工人不時將啲食油罐同鐵枝掉落地,啲聲大到嚇親佢哋,仲搞到成地油漬、玻璃碎,又點會有人嚟幫襯?」在荃灣鱟地坊經營雜貨店的劉太(化名)指,該處有回收商以四輛貨車為「流動回收站」,長期霸佔馬路作「舖面」,除即場收購紙皮、舊電器外,更當街分拆金屬製品,影響環境衞生及發出噪音,令客人避之則吉。同樣在上址經營零售生意的林先生(化名)亦指,回收車破壞衞生環境,降低顧客光顧意欲,「生意少咗三成。」

錶都唔入 變相無本生利

「呢啲回收車好多時連錶都唔入,變相無本生利。」荃灣區區議員羅少傑指出,已多次接獲商戶及居民反映回收車帶來滋擾,早前更有受影響的食肆經營不足半年即告倒閉,「洗完街都係咁污糟,啲街坊寧願運路行。」羅促請部門加強管理。

「點解佢哋一蚊租都唔使畀,就可以霸條街做生意,相反捱貴租嘅,就要受佢哋影響?」在港島南區香港仔大道經營音樂中心的黎先生亦指,附近同樣有回收店經常在店外停泊貨車,藉此擴大營業範圍,惟工人以鐵籠車搬運回收物上落貨車時,往往是「橫衝直撞」,「學生又唔係高大,佢哋推嗰陣又睇唔到前面,有好幾次爭啲撞埋去(學生)!」

孳生蚊蟲 滋擾商戶居民

「不時有啲蚊螆、烏蠅、曱甴入咗嚟,都有好多家長投訴,話擔心咁嘅環境,唔係太適合仔囡喺度上堂。」黎又指,該回收商在街道、後巷堆放大量紙皮,令該處成為蚊蟲溫床,他已擺放滅蚊燈,又在店外種植驅蚊植物,以及每逢學校長假期,即聘用滅蟲公司滅蟲,而當時剛鋪好的地氈,因質地易招蝨患,需更換成膠地板,損失近四萬元,「但係同食環投訴,佢淨係話會洗多次街。咁咪即係用公帑去同佢哋執手尾?」

「唔單止對守法嘅商戶好唔公平,對居民亦構成好大滋擾!」南區區議員徐遠華批評,已多次向執法部門反映問題,惟至今未獲正視,當中以食環署尤其令人失望,「明明千五蚊定額罰款好有阻嚇力,但佢哋偏偏就好少發告票。」

途人逼行馬路 易生意外

而在尖沙咀金巴利街,亦有回收車公然霸街經營。記者現場所見,不時有人以手推車運送金屬製品到貨車上,而馬路及行人路則放滿紙皮、膠箱、回收鐵籠,途人大多因躲避而走出馬路中心。附近商廈業主代表李泓毅指,街道目前不時傳出陣陣異味,行人路亦受阻塞,「對租戶嘅生意有好大影響。」

「收過好多旅客投訴,問點解香港環境咁差!」油尖旺區區議員關秀玲表示,回收車已對本港旅遊業及區內營商環境構成影響,而涉事地點設有入境處辦事處,不時有旅客出入,加上人流眾多,途人因回收車問題而被迫走出馬路,人車爭路下容易釀成意外,「但係執法部門好似冇佢哋符咁,等到出事先做嘢就太遲啦!」

食環署發言人證實,在過去三年,曾向三個涉事地點的違例人士提出三十五宗檢控,並發出逾五百五十張「移走障礙物通知書」及十四張定額罰款通知書,同期亦有與警方在香港仔及尖沙咀兩個涉事地點進行共七十三次聯合行動;而為打擊荃灣區內商業回收活動所造成的街道管理問題,亦有在荃灣民政事務處聯絡下,與警方、荃灣葵青地政處及環保署在荃灣區內進行逾百次聯合行動。

警方發言人表示,回收物品放置在馬路上對交通造成阻塞,可被控公眾地方造成阻礙,違例者可以被罰款五千元或監禁三個月;而車輛停泊方式可能對道路造成不必要的障礙,或對其他使用道路的人造成不必要的危險,或在非泊車處停泊,則可被票控罰款三百二十元。

圖/文︰專案組

第一手消息請下載on.cc東網iPhone/iPad/Android/Windows Phone Apps