政情：開網站惡搞特首候選人 巫堃泰被廉署請飲咖啡
今屆特首選舉期間，社運人士巫堃泰開設註冊域名為「carrielam.hk」，並喺今年一月林鄭月娥宣布參選特首後，喺網站上載多幅圖片，包括一張廁紙圖片，以諷刺林鄭月娥聲稱唔知道便利店冇廁紙賣。特首選舉事隔多月，巫堃泰尋日喺社交網站表示，收到廉政公署電話，指希望佢就有關域名及照片事宜協助調查。
喺特首選舉期間，出現過唔少支持或諷刺候選人嘅網站同專頁，唔知道除咗巫堃泰外，會唔會有更多人被廉署請去「飲咖啡」呢？
巫堃泰尋日喺社交網站透露收到廉署人員致電，希望佢協助調查有關域名「carrielam.hk」同四張上載喺該網站嘅照片，涉為一場公職選舉招致選舉開支事宜。
巫堃泰留言話，與呢個域名同稱呼嘅人「恒河沙數」，廉署自前特首梁振英上任後備受指摘，希望今次唔係另一宗政治打壓，令廉署與「打壓表達自由」，甚至「白色恐怖」扯上關係。