政情：水壓差冷氣壞 司長官邸要大維修 張建宗未住得
新政府上場快將兩周，政務司司長張建宗尋日同傳媒午宴，自爆位於山頂白加道嘅政務司司長官邸，因日久失修而存在好多結構性問題，包括廁所水水壓不足，「沖廁都唔夠力」，仲有冷氣機嚴重生銹，夏天開極都唔涼等，所以必須喺佢遷入之前進行大維修。
未動工 建築署評估中
佢透露，建築署現正就官邸狀況進行評估，制訂修葺範圍及方法，目前仍未正式動工，暫未知涉及多少費用。但由於官邸屬歷史建築，裝修費一定比普通政府建築物或私人住宅高。而時間方面，佢估計最少仲要兩個月先竣工，即最快九月中先可搬入官邸居住。
張建宗又提到，今屆政府希望做到反應快，例如日前嘅致命工業意外。佢憶述過去做勞工處長同勞福局長時，親身去過十二次殮房慰問身亡工人家屬，去急症室次數更加多不勝數。佢自言無人想去呢啲場所，但做問責官員，要關心市民就要去。
記得佢講過「每朝早打呔返工就好興奮」，他朝離開熱廚房又搵乜嘢工做呢？佢笑言自己離職後可豁免「過冷河」，因最低工資、取消對沖等都係佢主理，「將來一定唔會有人（商界）請我！」
