政情：醫委會改革 龐朝輝鬧張宇人一言堂

龐朝輝係上屆灣仔區議員，出身醫護世家，父親龐可榮係牙醫，其母龐曹聖玉係護士，龐太曾多次參與立法會衞生服務界選舉，至於龐朝輝就係眼科醫生及醫學會會董。

龐月初以電郵退黨 未獲回覆

幾時退黨？龐朝輝話喺本月初以一封正式嘅電郵表示退黨，但至今仍冇任何回覆，「覺得我可有可無啩」。佢話自己入黨已有十年，一直希望喺醫療政策方面及地區工作，加入政黨並非壞事，該黨人數唔多，亦冇太多醫療界專業人士，但可惜仍冇諮詢黨員嘅意見，懷疑張宇人代表嘅係乜嘢聲音。

佢又認為政黨應該聽取黨員意見，唔應該「一言堂」，一個黨太人治，就會缺乏政黨嘅功效，若只聽幾個人嘅意見「使乜入黨，做fans club咪得囉！」佢又話自己退黨後，仍會繼續服務社區，唔會因此而放棄社區工作。

張：呢啲黨員少一個都唔少

至於退黨事宜，張宇人回覆指呢個黨友將自己個人、業界嘅利益放喺黨整體嘅睇法上，以往佢冇得到黨嘅同意，出去講啲說話，黨已經算好大方，「呢啲黨員喺我嚟講，少一個一啲都唔少」，又認為冇人可以將個人利益凌駕黨。

被問及有否諮詢黨員時，張宇人說：「邊個話我冇諮詢（黨員），諮詢係淨係聽你一個人嘅意見就叫諮詢呀？」佢認為呢個政策，黨已講咗好多年，「如果佢成日都唔出現，係佢嘅問題，唔係我嘅問題，佢太過忙碌去做佢自己嘅私家醫務診所嘅生意係佢嘅問題」，又指黨內負責醫療嘅係立法會前議員方剛。