中環出更：張炳良未必做番教育老本行
新一屆政府月初已上任，唔少卸任後嘅局長都無官一身輕，周遊列國。運輸及房屋局前局長張炳良尋日就大爆自己即將去韓國旅行，仲話唔使做局長梗係輕鬆好多，講到會唔會重回教育老本行，佢就未決定，話要休息下先。
張炳良尋日出席大學舊生會活動，大談自己讀書時嘅經歷。佢話八十年代自己仍然係公務員時，獲獎學金到英國修讀碩士課程，當時因為朋友介紹，選擇咗位於伯明翰嘅阿斯頓大學（Aston University），但其實對學校一無所知，淨係識足球隊「阿士東維拉」。
自爆學生時代成日抄功課
但出乎意料，碩士生涯影響張炳良投身教育同研究，佢大爆自己做學生時係學運領袖，成日抄功課，更加好憎做老師。去到讀碩士時，佢先改變自己，唔單止日後做咗教育學院校長，而當時仲學到啲運輸交通同埋租金管制嘅知識，更加可以喺做局長時學以致用喎。
卓妮