中環出更：卸任遊美加 馬紹祥或翻兜「熱廚房」
即將卸任嘅發展局局長馬紹祥尋日與傳媒茶敍告別，直認當初加入政府時「都知道個廚房熱」，然而發展局每一日均有新聞，壓力很大，所以希望退下來後有更多私人空間，但不排除將來會重返「熱廚房」。佢又話短期內唔會重返老本行做工程顧問，反而對一帶一路推展工作有興趣，希望帶年輕人出外見識。
否認過檔機管局傳聞
對於傳聞佢過檔機管局，佢否認之餘又強調現時冇接受任何工作，但本身喜歡飛機同機場，八月起會到美加三藩市及溫哥華等地旅遊一個月。
由副局長升任局長，任內最深刻係首次上區議會解釋土地規劃工作，會議長達六、七小時，又指「一次過鬧晒總好過分開鬧」；新界東北嘅爭議亦令佢明白土地供應係大挑戰，形容相比運房局獲得嘅土地，發展局只係「餅碎」，數目多而且零碎。
佢又話任內遺憾未能見到東涌新市鎮擴展動工，即使項目面對爭議最少，又不涉收地，但至今仍未通過財委會撥款。對於政府建議研究郊野公園邊陲地帶建屋，佢就冇既定立場，但認為應理性討論，若認為郊野公園係神聖不可侵犯就太封閉。
對於接任人，佢話加入政府認識首名政務官就係候任局長黃偉綸，形容黃非常「貼地」又盡力協助解決問題，「無一百分都有九十五」。
卓妮