政情：蔣麗芸氹下屬買樓做顧家男

樓價屢創新高，有時年輕人置業都要靠父母畀首期。立法會議員蔣麗芸（Ann）尋日喺立法會提出成立「嬰兒基金」嘅動議，冀以政府同父母配對形式，為本地出生嘅嬰兒儲蓄至十八歲，然後用喺讀書或買樓。佢仲話一直有鼓勵下屬買樓，更成功「勸勉」其司機由買車變買磚頭，由廢青變顧家男喎。

阿Ann話佢一直有督促下屬買磚頭，所以每個下屬都有樓在手，連二十幾歲嘅職員都買咗居屋做業主。佢又話自己嘅司機以前一向鍾情買車，但車只會貶值，佢就叫對方轉買磚頭，笑言司機「由廢青變咗做有車、有家庭、有兒女」。

雖然阿Ann話嬰兒基金可以幫年輕人上車，但勞工及福利局局長蕭偉強喺答辯時就反駁，若所有兒童自小已有一筆金錢畀佢哋長大後花費，恐怕唔係最有效嘅方法去鼓勵孩子努力為自己嘅未來而積極做準備，又話現行政策較具有針對性，亦更有效運用公共資源。最後議案更被否決。